A organización Unión de Uniones denuncia a situación do sector leiteiro de vacún, ovino e caprino tras a publicación das cifras recollidas o pasado ano, polo Ministerio de Agricultura, en torno ao número de granxas operativas. Estes resultados de 2022 reflicten un claro descenso no número de explotacións dedicadas ao sector; sendo 782 menos en vacún (2,1 explotacións menos por día), 258 menos en ovino (0,7 explotacións menos por día) e 602 menos en caprino (1,6 explotacións menos por día).
No caso das granxas dedicadas á explotación de gando vacún, o impacto reflíctese especialmente na Comunidade Valenciana que, xunto coa Rioxa e Extremadura, perdeu entre un 17 e un 22 % das súas explotacións.
Pola súa banda, o sector caprino é o que máis sufriu a perda de gandeiros, tendo a maior proporción de peches en Baleares, Madrid e Aragón, entre outros. A ovella viuse especialmente afectada na Comunidade Valenciana, Aragón, Madrid, Cantabria e País Vasco, con caídas de entre o 25 e o 50 % das explotacións.
"Antes da publicidade bonita hai que chegar a unha remuneración xusta"
Unión de Uniones incide no incremento dos custos que se experimentou en 2022, especialmente no alimento dos animais, que ronda entre o 30 e o 40 % con respecto ao ano anterior. "Antes da publicidade bonita hai que chegar a unha remuneración xusta", declara a organización, moi crítica coa realidade do sector.
