Unión de Uniones de Agricultores y Ganaderos reclama ao Ministerio de Agricultura e ao resto de autoridades competentes unha revisión integral nas políticas de loita contra a tuberculose, debido aos prexuízos que o sistema actual provoca ao sector gandeiro, en ocasións sen lograr melloras na situación da enfermidade. A entidade solicita unha revisión dos métodos de detección, de cara a identificar novas técnicas ou procedementos que permitan evitar os falsos positivos.
A organización lamenta os problemas que sofren os gandeiros cando se descubre un positivo no campo que, porén, se demostra negativo tras o sacrificio. Así, considera que a desconfianza cara os controis existentes é moi grande entre os produtores, o que provoca situacións de incerteza.
Por outra parte, no novo Programa Nacional de Erradicación recóllese a obrigación de que os xatos vendidos a cebadeiros deben ser saneados nos 30 días anteriores ao movemento ou ter sido chequeados nos 6 meses previos; Unión de Uniones considera este requirimento como desproporcionado, ao ter que asumir os gandeiros uns custos extraordinarios, ademais de dificultar o movemento de xatos en todas as explotacións.
A maiores, desde a entidade tamén denuncian que as indemnizacións que habilita o Ministerio de Agricultura tras un sacrificio obrigatorio son claramente insuficientes e na maioría dos casos non variaron desde 2011, mentres que o mercado de gando vacún, ovino e caprino si o fixo, con incrementos nos últimos anos, polo que as compensacións non suplen o valor real do animal sacrificado. Por tanto, piden unha revisión do Real Decreto 389/2011 e un aumento dos pagos para que sexan acordes ao mercado actual.
