- Este tipo de seme permite seleccionar o sexo da descendencia.
- Tras o acordo con Sexing Technologies, os equipos para o sexado desprazaranse a XF en dous períodos anuais para a produción dun mínimo de 30.000 doses de seme sexado ao ano.
Poducir seme sexado en España será posible e farase en exclusiva nas instalacións de Xenética Fontao SA a partir do ano 2022, o que supón asegurar a capacidade de produción propia de seme sexado para o sector bovino.
Anteriormente, Xenética Fontao (XF) enviaba os seus touros ao Reino Unido, onde se producían as doses e, aínda que a relación co Reino Unido mantense aberta, a partir do próximo mes de febreiro as doses produciranse en Galicia.
Ao efectuarse o proceso nas instalacións de XF poderase dispor de seme sexado de todos os touros da sociedade e, por tanto, dunha maior diversidade xenética. A maiores, será posible obter doses sexadas tamén para machos.
PROCESO DE ACORDO
O proxecto foi posto en marcha hai seis meses polo Consello de Administración da sociedade pública Xenética Fontao SA, no que se integran a representación de Acruga e Fefriga, ao ser considerado polo sector produtivo como de alto interese estratéxico para o seu futuro.
Iniciouse así o proceso de negociación entre os equipos de XF e a multinacional norteamericana Sexing Technologies, propietaria das patentes desta tecnoloxía exclusiva e tecnicamente específica, e, finalmente, o proceso finalizouse onte, 28 de xuño, coa firma do contrato entre as partes.
XF ten aínda que abordar as adaptacións e instalacións técnicas necesarias para o funcionamento do Laboratorio de Sexado, que espera ter finalizadas para finais do mes de outubro.
Os equipos para o sexado, de alto valor económico, desprazaranse a XF en dous períodos anuais para a produción dun mínimo de 30.000 doses de seme sexado ao ano e espérase iniciar a produción a principios de febreiro de 2022.
VANTAXE DO SEME SEXADO
O seme sexado está a converterse nun produto estratéxico para o sector lácteo, xa que cada vez é máis utilizado na inseminación artificial por razóns de custos de produción, pois nas doses sexadas para a inseminación artificial un 90 % dos espermatozoides seleccionados levan os cromosomas XX, que permiten garantir cunha alta probabilidade a reposición das xeracións seguintes con xovencas de alta xenética. Normalmente, en condicións naturais, nacen un 51 % de femias (XX) e un 49 % de machos (XY).
Dispor desta capacidade a nivel local é de singular importancia para o sector. Ademais, o proxecto está aberto á cooperación cos outros centros de inseminación españois e estranxeiros.
