A Asociación de Profesorado de Agraria de Galicia (Apeaga) promove a matrícula nas titulacións de formación profesional neste ámbito impartidas en centros públicos. Desde o 16 de xuño ata o 2 de xullo permanece aberto o prazo de solicitude de admisión.
A oferta abrangue desde os programas formativos básicos ata os ciclos superiores. En canto ao primeiro, relacionado coa gandería, impártese o programa de Producións agrícolas no Centro de Educación Especial (CEE) Manuel López Navalón, en Santiago de Compostela (A Coruña).
No que respecta aos ciclos básicos, ofértase a titulación en Actividades agropecuarias en dous centros lucenses: no IES da Terra Chá, José Trapero Pardo (Castro de Rei) e no IES Plurilingüe Fontem Albei (A Fonsagrada).
Pola súa banda, o ciclo medio de Produción agropecuaria impártese no Centro de Formación e Experimentación Agroforestal (CFEA) de Sergude (Boqueixón, A Coruña), no IES de Arzúa (A Coruña) e no IES Cidade de Antioquía (Xinzo de Limia, Ourense).
Por último, o ciclo superior de Gandería e asistencia en sanidade animal ofértase no CFEA de Sergude, no IES de Melide (A Coruña) e no IES Cidade de Antioquía.
Desde a asociación consideran a formación como "clave para a revitalización da economía rural e para minimizar as consecuencias do cambio climático". Insisten en que os ciclos que abranguen esta familia profesional "contan cunha alta inserción laboral".
