A Xunta Reitora do Consorcio da Feira Agrogandeira e Agroalimentaria de Valle de Los Pedroches (Confevap) acordou a suspensión da próxima edición da cita, que se ía a desenvolver do 23 ao 26 de abril no recinto feiral de Pozoblanco. Confevap explicou que se trata dunha decisión difícil, pero que vén condicionada pola actual crise sanitaria que vive España e polas medidas implantadas polas autoridades co fin de evitar a propagación do coronavirus.
Desde Confevap quixeron enviar unha mensaxe de agradecemento a todas as empresas e profesionais que xa viñan traballando desde hai meses na planificación da feira. De igual modo, agradeceron o interese que mostraran, un ano máis, institucións públicas, empresas, asociacións, agricultores e gandeiros, que esperaban esta data con interese tras os anos precedentes, nos que se alcanzaron cifras históricas de visitantes e volume de negocio. Así mesmo, a Xunta Reitora mostrou o seu recoñecemento ao labor que o sector agrogandeiro e agroalimentario está a realizar neste período de restricións, pois grazas ao seu traballo os mercados están abastecidos e a cidadanía pode contar cos produtos de primeira necesidade.
Outras citas canceladas
A suspensión desta feira súmase á doutros eventos do sector que tampouco se celebraron por esta mesma causa, como a Moexmu (Lugo), a Fira do Camp de Menorca, a Poxa de Elite de Curtis (A Coruña), La Nuit da Holstein (Libramont), Agros (Braga) ou o Mercat del RAM e o Concurso Catalán da Raza Frisona (Barcelona).
