O Fondo Español de Garantía Agraria (FEGA) acaba de publicar o informe de entregas de leite correspondente ao mes de decembro, no que se rexistra un prezo medio do conxunto estatal de 0,339 €/litro, superior ao do mesmo período do ano 2019, 0,338 €/litro, e ao de inicios de 2020, 0,336 €/litro.
A crise global ocasionada pola pandemia da covid-19 provocou un descenso no prezo medio do leite desde o mes de marzo ata mediados de ano que se recuperou na segunda metade de 2020, ata superar a cifra rexistrada en xaneiro. Ademais, en todos os meses de 2020 o prezo medio do leite en España foi superior aos correspondentes periodos de 2019. Así, o informe do FEGA mostra un balance total do ano en positivo en canto a prezos, aínda habendo tamén incremento na cantidade (t) de entregas de leite.
Se diferenciamos entre comunidades, Canarias (0,425 €/litro), Asturias (0,358 €/litro), País Vasco (0,356 €/litro) e a Comunidade Valenciana (0,355 €/litro), manteñen os importes máis elevados mentres que Baleares (0,325 €/litro), Galicia (0,329 €/litro) e Murcia (0,332 €/litro) sitúanse no outro extremo.
