A Central Agropecuaria de Galicia Abanca viviu hoxe unha xornada histórica coa venda da vaca máis cara rexistrada ata o momento neste recinto de Silleda. A protagonista foi unha vaca mestiza nacida en febreiro de 2021, procedente dunha explotación de Boimorto (A Coruña), que alcanzou un prezo de 7.798 euros, superando o anterior récord en femias establecido en marzo de 2024 con 7.728 euros. A compradora foi a empresa Frigoríficos Bandeira.
O récord xeral da Central —sen distinción de sexo— segue a pertencer a un boi mestizo vendido o 8 de outubro de 2024 por 10.498 euros. O novo rexistro marca un fito dentro da categoría de vacún maior e reflicte o interese crecente pola calidade das femias galegas en produción cárnica.
Segundo os datos da poxa semanal celebrada hoxe, o prezo medio do vacún maior situouse en torno aos 1.572,27 euros para machos e 1.397,13 euros para femias. As vacas de categoría extra acadarían medias de 1.654,62 euros por unidade, mentres que as da primeira categoría rondaron os 1.605,42 euros. As de segunda categoría situáronse nos 1.331,33 euros, e as de desfeito, nos 993,96 euros.
A sesión contou cunha participación elevada, con máis de 900 animais adxudicados e preto dun milleiro de asistentes entre gandeiros, tratantes e compradores profesionais.
