A Granxa Gayoso Castro, en Castro de Ribeiras de Lea (Lugo), será o escenario o vindeiro 30 de outubro da xornada DigiPurin, un encontro técnico dedicado a amosar as últimas innovacións na aplicación e xestión dixital do xurro. A cita, organizada polo grupo BioModem da USC en colaboración co Centro de Competencias Dixitais do Ministerio de Agricultura, Pesca e Alimentación, reunirá a técnicos, gandeiros e empresas do sector agropecuario interesadas en mellorar a eficiencia e sustentabilidade desta práctica clave para o aproveitamento de nutrientes nas explotacións.
O programa, que se desenvolverá de 10:00 a 15:00 horas, combina demostracións de campo e sesións prácticas sobre ferramentas de dixitalización e control técnico. Entre os contidos destacan os sistemas de aplicación de xurro con baixas emisións, a medición de nutrientes mediante sensores —como a tecnoloxía NIRS ou a condutividade eléctrica— e o uso de software de rexistro e trazabilidade para documentar todo o proceso de fertilización.
Durante a xornada, os asistentes poderán observar distintos equipos de aplicación, desde sistemas de prato de choque ata barras con tubos colgantes ou reixas de enterrado, e comprobar como as ferramentas dixitais permiten optimizar o uso dos xurros segundo a súa composición e as necesidades do cultivo.
A iniciativa forma parte da rede de demostradores posta en marcha polo Centro de Competencias Dixitais, a cal busca achegar a dixitalización ao sector mediante demostracións prácticas en diferentes puntos de España. O seu obxectivo é mellorar a eficiencia dos recursos e reducir o impacto ambiental, aliñándose coas políticas europeas de sustentabilidade agraria.
A participación na xornada é gratuíta, aínda que require inscrición previa, xa que as prazas están limitadas a 50 persoas. O prazo de inscrición remata o 25 de outubro.
