Con motivo do seu 30 aniversario Anka organizou en Pamplona unha xornada enfocada na saúde podal do gando vacún. Máis de 15 entidades vinculadas ao sector gandeiro deron apoio a esta iniciativa, desde industrias lácteas a asociacións de gandeiros, pasando por grupos de veterinarios, podólogos e a Universidade Pública de Navarra. Todos coincidiron no obxectivo da xornada: pór de manifesto a importancia da saúde podal como un dos indicadores máis importantes do benestar en gando vacún leiteiro.
A xornada contou con tres relatores de diferentes ámbitos do sector. Adrián González, fundador e director técnico do grupo Anka, repasou como cambiou a podoloxía bovina nestes últimos 30 anos e explicou os factores máis importantes na saúde podal de hoxe en día; Sergio Calsamiglia, catedrático da Universidade Autónoma de Barcelona, tratou a importancia da observación e dos coidados precoces das vacas e como as novas tecnoloxías poden predicir as enfermidades facilitando a súa prevención, e James Husband, director técnico de EBVC (Inglaterra), explicou a importancia da locomoción como indicador de benestar e como en Inglaterra as grandes superficies xa pagan aos produtores de leite en función do benestar dos animais.
