O recinto feiral Luis Adaro de Xixón (Asturias) acollerá mañá o 45.º Concurso Nacional da Raza Frisona, organizado pola Confederación Nacional de Frisona Española (Conafe). O certame, que se celebra durante a Feira Monográfica do Campo e das Industrias Agrícolas, Gandeiras, Forestais e Pesqueiras de Asturias (Agropec), será retransmitido en directo polo equipo de Vaca TV.
Nesta edición participarán preto de 300 animais de 64 ganderías procedentes de Asturias, Cantabria, Castela e León, Cataluña, Galicia, Navarra e País Vasco. Este ano Llinde Ariel Jordan non participará no certame, co cal coñeceremos á súa substituta.
As primeiras seccións do día comezarán ás 10:00 horas coas xatas e xovencas, mentres que as vacas sairán á pista ás 15:00 horas. Nesta ocasión, haberá dous xuíces de Conafe valorando os exemplares: Santiago García Souto, como xuíz do Nacional 2025, e Javier Freije Freije, que acompañará ao primeiro como xuíz adxunto.
Hoxe venres celébrase ademais o 35.º Concurso Nacional da Raza Parda, co italiano Daniele Galbardi como xuíz. A fin de semana concluirá co XXIV Campionato Nacional de Manexadores, que se desenvolverá a partir das 10:30 horas do domingo e no que os máis novos se dividirán en diferentes categorías: infantil, júnior e sénior.
