Space defínese como unha feira na procura da innovación e, neste caso, a maior innovación de todas tivo que facela, por forza, o propio salón. Coa pandemia por COVID-19 aínda moi presente nas nosas vidas, o máis sensato foi aprazar esta reunión física, aínda que non por iso deixaron de ofrecer contido. Ademais de dixital, a oferta este ano foi, como sempre, ampla e variada.
“As disposicións sanitarias que, sen dúbida, deberemos seguir aplicando no mes de setembro non poderán adoptarse de maneira estrita na Space debido á alta concentración de persoas nesta feira. O respecto da distancia física non sería viable nin aplicable nos postos, nas filas de espera, nos espazos de conferencias, de restauración, de recepción etc.”. Así anunciou o pasado mes de maio a organización de Space a anulación da 34.ª edición da súa feira.
O Salon International des Productions Animales congrega todos os anos en Rennes máis de 1.400 expositores e máis de 100.000 visitantes chegados dun cento de países. Nesta rexión, o sector agrícola e todos os seus traballadores son motores moi importantes –estímase que a repercusión económica da feira supera os 90 millóns de euros ao ano–. Por conseguinte, participar nunha cita de tales dimensións require dunha preparación e da elaboración de orzamentos con varios meses de antelación para os seus expositores, provedores e socios, “e dada a incerteza actual, pareceunos fundamental evitar que o conxunto da nosa comunidade teña que correr demasiados riscos financeiros”, destacaron.
No entanto, co obxectivo de “manter o vínculo entre membros da nosa comunidade, expositores e visitantes”, Space foi capaz de reinventarse sobre a marcha para afrontar esta crise “de forma reactiva e anticipada” e, entre o 15 e o 18 de setembro, ofreceu un amplo abano de actividades online de interese.
